தினம் ஒரு தன்னம்பிக்கை கதை ...முயற்சியை கைவிடாதே..

தவளை ஒன்று தன்னைச் சுற்றியிருக்கும் உலகத்தைப் பற்றி அறிந்துகொள்ள மிக ஆவலாக இருந்தது. புதிய உலகத்தைக் கண்டறியும் பொருட்டு சுற்றிக்கொண்டிருந்த வேளையில் எதிர்பாராதவிதமாக பால்குடத்தில் விழுந்துவிட்டது. குதித்து வெளியேற முற்பட்டது. பாத்திரம் உயரமாக இருந்ததால் முடியவில்லை. பாத்திரத்தின் அடிமட்டத்திற்காவது செல்லலாம் என்று நினைத்தபோது ஆழம் மிக அதிகமாக இருந்தது.

பால் அதன் பார்வையை மறைக்க, உயிர் பிழைப்பதற்கு எந்தவிதமான நம்பிக்கையும் அற்ற நிலையில் தன் வாழ்க்கை இதோடு முடிந்து விட்டது என்று நினைத்துக் கொண்டது தவளை. ஆனாலும் மேலே வரும் முயற்சியை கைவிடுவதாக இல்லை. உதைத்தது; குதித்தது; எம்பியது; இனி பாலைச் சார்ந்துதான் தன் வாழ்க்கை இருப்பதாக நினைத்துப் போராடியது.

கால்கள் வலித்தன. ஆனாலும் விடாமல் உதைத்துக் கொண்டும், குதித்துக் கொண்டும், எம்பிக் கொண்டும் இருந்தது. உதைத்துக் கொண்டே இருந்ததால் பால் திரிந்து வெண்ணெய் பந்தாக ஆனது. அதிலிருந்து எம்பிக் குதித்து வெளியே வந்தது.

தவளையைப் போல சில இடர்பாடுகளில் நாம் சிக்கிக் கொள்ளும்போது அதை எவ்வாறு எதிர்கொள்கிறோம் என்பதைப் பொறுத்தே நம் எதிர்கால வாழ்க்கை அமையும். வாழ்க்கையில் ஏதோ ஓர் உணர்வுப் பூர்வமான அழுத்தத்துக்கு நாம் ஆட்பட்டிருக்கும்போது உதைத்துக்கொண்டே இருக்கவும், போராடிக் கொண்டே இருக்கவும் வேண்டும் என்பதை நினைவில் கொள்ள வேண்டும். இக்கட்டான சூழ்நிலைகளில் நாம் என்ன செய்கிறோமோ அதன் விளைவே அடுத்த நிகழ்வாக அமையும். அது நமக்கு உயிர் வாழ்தலை மீட்டுக்கொடுப்பதோடு மட்டுமல்லாமல் நம் வாழ்க்கையையே மாற்றக் கூடியதாகவும் இருக்கும்