70வது சுதந்தர தினக் கொண்டாட்டத்துக்குத் தயாராகும் மக்கள்: தீவிர பாதுகாப்பு

புது தில்லி: இந்தியாவின் 70வது சுதந்தர தினத்தை நாளை வெகு சிறப்பாகக் கொண்டாடுவதற்கான அனைத்து ஏற்பாடுகளும் நடந்து வருகின்றன. நாடு முழுவதும் பாதுகாப்பும் பலப்படுத்தப்பட்டுள்ளது.

தலைநகர் புது தில்லியில், தேடப்படும் பயங்கரவாதிகளின் பட்டியலை அச்சடித்திருக்கும் தில்லி காவல்துறையினர் சிறப்புப் பிரிவு அதனை மக்களுக்கு வழங்கி வருகிறது. 

மிக மோசமான பயங்கரவாத இயக்கத்தைச் சேர்ந்த பயங்கரவாதிகளின் புகைப்படம் அடங்கிய போஸ்டர்களும் ஒட்டப்பட்டுள்ளன.

மும்பையின் முக்கிய இடங்களில் ஏராளமான காவல்துறையினர் குவிக்கப்பட்டுள்ளனர். மக்கள் அதிகம் கூடும் இடங்கள் மற்றும் முக்கிய சந்திப்புகளில் வாகன தடுப்புகள் அமைக்கப்பட்டு அனைத்து வாகனங்களும் கண்காணிக்கப்படுகின்றன.

கோவையில், பழங்களைக் கொண்டு சுதந்தர போராட்ட வீரர்களின் உருவங்கள் உருவாக்கப்பட்டுள்ளது. மேலும், தர்பூசணி மற்றும் கத்திரிக்காய் கொண்டு இந்திய வரைபடம் மூவர்ண நிறத்தில் உருவாக்கப்பட்டுள்ளது.

ஆகஸ்ட் 15ம் தேதி செவ்வாய்க்கிழமை காலை தில்லியில் உள்ள செங்கோட்டையில் இந்தியாவின் 70வது சுதந்தர தினக் கொண்டாட்டங்கள் நடைபெற உள்ளன.

தமிழகத் தலைநகர் சென்னை மற்றும் அனைத்து மாநில தலைநகரங்களிலும் சுதந்தர தின விழா சிறப்பாகக் கொண்டாடப்பட உள்ளது. இதற்கான ஒத்திகை நிகழ்ச்சிகளும் நடந்து முடிந்துள்ளன.

அனைத்து மாநிலங்களிலும் காவல்துறையினர் உஷார் நிலையில் உள்ளனர்.